Iiraan oo meesha ka saartay suurtagalnimada kulan Trump iyo Hoggaamiyaha Sare

Dowladda Iiraan ayaa si rasmi ah u diidday suurtagalnimada kulan dhex mara Madaxweynaha Mareykanka, Donald Trump, iyo Hoggaamiyaha Sare ee Iiraan, Mojtaba Khamenei, iyadoo ku tilmaantay arrintaasi mid aan waaqici ahayn xilligan.

Wasiirka Arrimaha Dibadda ee Iiraan, Abbas Araghchi, ayaa wareysi uu siiyay warbaahinta ku sheegay in inkastoo Trump uu muujiyay rabitaankiisa ah inuu la kulmo hoggaamiyaha sare ee Iiraan, haddana aysan jirin xaalad siyaasadeed ama diblomaasiyadeed oo hadda suuragelin karta kulan noocaas ah. Araghchi wuxuu yiri, “Waa inaan noqonnaa kuwo dhab u fekeraya oo eegaya xaqiiqada jirta,” isagoo meesha ka saaray suurtagalnimada kulankaas.

Hadalkan ayaa yimid kadib markii Trump uu waraysi ku sheegay inuu jeclaan lahaa inuu la kulmo Khamenei haddii ay horumar ka gaaraan wada-hadallada u dhexeeya Washington iyo Tehran. Si kastaba ha ahaatee, mas’uuliyiinta Iiraan ayaa aaminsan in xiisadaha siyaasadeed iyo khilaafaadka weli taagan ay caqabad ku yihiin kulan toos ah oo heerkan ah.

Xiriirka u dhexeeya Mareykanka iyo Iiraan ayaa muddo dheer ahaa mid ay hareeyeen khilaafaad siyaasadeed, amni iyo kuwa la xiriira barnaamijka nukliyeerka ee Iiraan. Inkasta oo mararka qaar ay jireen dadaallo diblomaasiyadeed, haddana labada dal wali ma gaarin heshiis buuxa oo soo afjara khilaafaadka u dhexeeya.

Diidmada cusub ee Tehran ayaa muujinaysa in hoggaanka Iiraan uusan hadda u arkin kulan dhex mara labada dhinac mid wax ku ool ah ama ka tarjumaya xaaladda dhabta ah ee gobolka iyo xiriirka labada dal.