Caro iyo diidmo ka taagan Israa’iil kadib is-afgaradkii cusubaa ee Mareykanka iyo Iiraan

Kadib markii Mareykanka iyo Iiraan ay wada saxiixdeen qoraal is-afgarad (Memorandum of Understanding – MOU), waxaa magaalada Tel Aviv iyo guud ahaan Israa’iil ka billowday caro iyo diidmo siyaasadeed iyo mid warbaahineed.

Warbaahinta Israa’iil ayaa sheegtay in heshiiskan uu walaac weyn ku abuuray hay’adaha siyaasadda iyo kuwa amniga, kuwaas oo aaminsan in is-afgaradka cusub uu xaddidi karo awoodda ay Israa’iil uga falcelin karto arrimaha la xiriira Iiraan, isla markaana uu Tehran u horseedi karo faa’iidooyin siyaasadeed iyo kuwo diblomaasiyadeed.

Sidoo kale, waxaa sii xoogaystay dhaleeceynta loo jeedinayo maamulka Madaxweynaha Mareykanka, Donald Trump, iyadoo siyaasiyiin Israa’iiliyiin ah oo ku dhow xukuumadda ay ku eedeeyeen qaar ka mid ah la-taliyeyaashiisa inay sameeyeen tanaasulaad aan waafaqsanayn danaha Israa’iil.

Warar kala duwan ayaa sidoo kale sheegay in Mareykanku uu Israa’iil ku cadaadinayo inay taageerto waddada diblomaasiyadda isla markaana ay yareyso xiisadaha ka taagan qaar ka mid ah jihooyinka gobolka, arrintaas oo ay si cad uga hor yimaadeen xubno ka tirsan dowladda Israa’iil.

Dhanka kale, faahfaahinta heshiiska iyo habka loo fulin doono ayaa weli dood iyo is-afgaranwaa ka taagan yihiin, iyadoo ay jiraan kala aragti duwanaansho u dhexeeya Mareykanka iyo Israa’iil oo ku saabsan amniga gobolka iyo mustaqbalka xiriirka lala yeelanayo Iiraan.