Soomaaliya oo Bilowday Barnaamij Cusub oo Lagu Xoojinayo Amniga Garoomada Diyaaradaha iyo Xuduudaha

Dowladda Federaalka Soomaaliya ayaa daahfurtay barnaamij cusub oo ay taageerayso Dowladda Boqortooyada Midowday (UK), iyadoo iskaashi la leh Hay’adda Caalamiga ah ee Socdaalka (IOM), si loo xoojiyo amniga garoomada diyaaradaha iyo maamulka xuduudaha dalka.

Barnaamijkan ayaa ujeeddadiisu tahay in la casriyeeyo hababka ilaalinta xuduudaha, la kordhiyo awoodda hay’adaha socdaalka, lana adkeeyo la dagaallanka tahriibka dadka, dambiyada abaabulan iyo khataraha kale ee ka gudba xuduudaha.

Sidoo kale, mashruucu wuxuu diiradda saari doonaa tababarka saraakiisha socdaalka iyo amniga, horumarinta farsamooyinka lagu xaqiijiyo dukumentiyada safarka, iyo kor u qaadidda iskaashiga Soomaaliya la yeelanayso dalalka gobolka si loo sugo amniga xuduudaha.

Mas’uuliyiinta ayaa sheegay in tallaabadan ay qayb ka tahay dadaallada Dowladda Soomaaliya ay ku doonayso inay dhisto nidaam casri ah oo lagu maamulo socdaalka iyo amniga garoomada diyaaradaha, iyadoo la waafajinayo heerarka caalamiga ah.

Barnaamijkan cusub ayaa la filayaa inuu sare u qaado awoodda Soomaaliya ee ka hortagga dambiyada ka gudba xuduudaha, isla markaana uu fududeeyo safarka sharciyeysan iyo iskaashiga caalamiga ah ee dhinaca amniga iyo socdaalka.